Azərbaycan Respublikasının Pakistandakı fövqəladə və səlahiyyətli səfiri Əli Əlizadə dünyada və Pakistan ərazisi üzrə geniş yayımlan Pakistanın dövlət televiziya kanalı olan PTV kanalının “Diplomatic Enclave” proqramının qonağı olub.
Aparıcının suallarının cavablandıran səfir Əli Əlizadə Azərbaycan Diplomatiyasının bu il 100 illik yubileyini qeyd etdiyini bildirərək istər Azərbaycan Demokratik Respublikası dövründə istərsədə müstəqilliyinin bərpasından sonra da Azərbaycanın daim dostluğa, əməkdaşlığa, qarşılıqlı hörmətə əsaslanan xarici siyasət yürütdüyünü, müstəqil, praqmatik və tarazlaşdırılmış çoxşaxəli xarici siyasətin Azərbaycanın ətrafında xoşməramlı mühitin formalaşmasına səbəb olduğunu və işğalçı Ermənistan istisna olmaq Azərbaycanın bütün dünya dövlətləri ilə möhkəm və sıx dostluq münasibətlərinin olduğunu diqqətə çatdırıb. Səfir Azərbaycanla Pakistan arasında bərqarar olmuş dostluq və qardaşlıq, starteji tərəfdaşlıq əlaqələrinin bu siyasətin bir göstərici olduğunu, Azərbaycan Respublikası Prezidentinin Pakistanla əlaqələrə xüsusi diqqət göstərdiyini, Azərbaycanın hər zaman Pakistanı bütün beynəlxalq və reğional məsələlərdə dəstəklədiyini qeyd edib.
Dağlıq Qarabağ münaqişəsinə dair fikirlərini bölüşən səfir Əli Əlizadə işğalçı Ermənistanın davam etdirdiyi təcavüzkar siyasət nəticəsində hələdə azərbaycanlıların erməni terroru və vəhşiliyindən əziyyət çəkdiyini, 26 fevral tarixində 27-ci ildönümü tamam olacaq, erməni işğalçılarının ən qəddarcasına törətdiyi Xocalı Soyqırımının bunun bir bariz nümunəsi olduğunu, bir gecədə qədim Xocalının yerlə-yeksan edildiyini bildirib. Səfir Pakistanın Xocalı Soyqırımını tanıyan ilk ölkələrdən olmasının və qəbul edtiyi qətnamələrin ədalətin bərpası yönündə atdığı humanist addım olduğunu və Pakistanın Azərbaycana dəstəyinin daim məmnunluqla qarşılandığını vurğulayıb.
Azərbaycanın idaəetmə quruluşu, mədəniyyəti, elmi, səhiyyə sistemi, iqtisadiyyatı haqqında da aparıcının suallarını cavablandıran Əli Əlizadə Dağlıq Qarbağ münaqişəsinin nəticələrinə, Ermənistanın Azərbaycana qarşı işğalçılıq siyasətinə baxmayaraq ölkə rəhbərliyinin apardığı uğurlu siyasət, həyata keçirilən islahatlar nəticəsində, sahibkarlıq fəaliyyəti üçün yaradılan münbit şərait hesabına Azərbaycanın sürətlə inkişaf etdiyini, Azərbaycanın iqtisadiyyatının neftdən asılılığını minimuma endirməyi bacardığını və qeyri-neft sektorunda iqtisadi artım tepmini təmin etdiyini ifadə etmişdir. Azərbaycanın Pakistanla iqtisadi-ticari sahədə də əməkdaşlığın artırılmasında maraqlı olduğunu qeyd edən səfir, bu sahədə potensial və imkanlar haqqında məlumat vermiş, qarşılıqlı investisiya üçün imkanların olduğunu, iki ölkə arasında birbaşa hava reyslərinin açılacağı təqdirdə gediş gəlişin daha da sürətlə yüksələcəyini, son 2 ildə bu artımın 10 dəfədən artıq olduğunu və daha da artacağını söyləyib. Humanitar və sosial sahədə də əlaqələrin inkişaf etdiyini qeyd edən səfir, Heydər Əliyev Fondunun və onun Prezidenti Mehriban Əliyevanın təşəbbüsü və dəstəyi ilə Pakistanda həyata keçirilən işlərin yüksək qiymətləndirildiyini, bu işlər nəticəsində Mehriban xanımın Pakistanın ən yüksək mükafıtı ilə təltif olunduğunu bildirən proqramın aparıcısının fikirlərinin təsdiqləyərək bu işlərin davam etdiyini bildirib.
Səfir Əli Əlizadə həmçinin, aparıcının suallarına cavab olaraq Əfqanıstanda sülh və sabitliyinin bərpası prosesində Azərbaycanının göstərdiyi səylər və verdiyi tövfə, Pakistanın terror və ekstremizmlə mübarizə sahəsində fəaliyyəti və verdiyi qurbanlar, Kəşmir məsələsində Azərbaycanın mövqeyi və digər məsələlərlə bağlı fikirlərini bölüşüb.
